Новости

Красильников 100 сааhа

IMG 20210415 110218 381

Муус устар 14 күнүгэр оскуолабытыгар, нэһилиэкпитигэр улахан үөрүүлээх, долгутуулаах дьаһал ыытылынна. Ол курдук саха норуотун чулуу уола, космос куйаарын, сардаҥа ардаҕын чинчийбит Сэбиэскэй Сойуус Ленин бириэмийэтин лауреата, Аҕа дойду улуу сэриитин кыттыылааҕа, биир дойдулаахпыт, космофизик учуонай Дмитрий Данилович Красильников 100 сааһын бэлиэтиир, үйэтитэр дьаһаллар чэрчилэринэн ыытыллыбыт, кини кутуллан оҥоһуллубут мөссүөнүн арыйыы үөрүүлээх түгэнэ үрдүк таһымҥа, өрө көтөҕүллүүнэн буолан ааста. Үөрэнээччилэр, оскуола бүттүүн кэлэктиибэ, нэһилиэк дьоно-сэргэтэ бу түгэни долгуйа, киэн тутта көрүстүлэр. Кыттыыны ыллылар Д.Д.Красильников кыыһа Наталья Дмитриевна Красильникова Мординова, сиэннэрэ Надежда Алексеевна Степанова, Алексей Алексеевич Красильников, Дмитрий Данилович олохтообут ШАЛ лаборатория солбуйааччы директора А. В. Сабуров, СӨ Ил Түмэн Судаарыстыбаннай Мунньаҕын сис кэмитиэтин бэрэссэдээтэлэ, педагогическэй билим дуоктара М.Д.Гуляев, СӨ Үөрэҕирии уонна наука миниистирин солбуйааччы И.П.Любимова, "Чурапчы улууһа" МТ дьаһалтатын социальнай эйгэҕэ солбуйааччы Н.И.Аммосов, Чурапчы улууһун үөрэҕин управлениятын начальнига Ю.П.Посельскай, оскуолабытыгар өр сылларга үлэлээн үрдүк таһымҥа таһаарбыт директорбыт А.А.Федоров, Красильников хаан-уруу аймахтара.

Үөрүүлээх дьаһал салгыытынан Чурапчыга А.А.Саввин аатынан этнографическай музейга Дмитрий Данилович выставкатын арыйыы буолла. Выставкаҕа Дмитрий Данилович туттубут маллара, наҕараадалара, хаартыскалар, суруйбут дневнигэ онтон да атын кэрэхсэнэр маллар дьон-cэргэ көрүүтүгэр туруорулуннулар. Быыстапканы сиэнэ Надежда Дмитриевна Степанова тэрийэн туруорда.

Үйэтитии иккис чааһынан Мугудай нэһилиэгин спорт саалатыгар Д.Д.Красильников сардаҥалаах олоҕун сырдатар Төгүрүк остуол буолла. Дмитрий Данилович олоҕун кэрдиис кэмнэрин туһунан таҥыллан оҥоһуллубут бэртээхэй киинэни дьон-сэргэ көрүүтүгэр таһаардылар. Кини туһунан "Его имя носит моя школа" диэн докладынан 4 кылаас үөрэнээччитэ Дьулустан Скрябин кытынна. Салгыы кыыһа Наталья Дмитриевна, сиэнэ Надежда Алексеевна, ШАЛ салайааччыта Артем Владимирович Сабуров Дмитрий Данилович үлэтин-хамнаһын, кини аҕа, эһээ быһыытынан үтүөкэн хаачыстыбаларын ахтан-санаан билиһиннэрдилэр. Биир дойдулаахпыт М.Д.Гуляев, Н.И.Аммосов оҕолорго туһаайан Дмитрий Данилович албан аатынан киэн тутта, киниэхэ тэҥнэһэ үүнүөхтээхтэрин, сайдыахтаахтарын тоһоҕолоон эттилэр, кинини үйэтитиигэ араас таһымнаах үлэ-хамнас салгыы барыахтааҕын чопчулаатылар. Оскуолабыт директора Иннокентий Сергеевич Юмшанов Дмитрий Данилович аатын чиэстээхтик сүгэр туһуттан оскуола коллектива туруулаһан үлэлиирин, инники күөҥҥэ сылдьарын туһунан билиһиннэрдэ.

Кэлбит ыалдьыттар Дмитрий Данилович аатын сүгэр оскуоланы кэрийэн көрөн-истэн, оскуола үтүөкэн көрүҥүттэн, үлэ-хамнас барыытыттан, ситиһии элбэҕиттэн, оскуола сайдыыны кытта тэҥҥэ хардыылыырыттан, үөрэнээччилэр оскуолаларын үөрэ-көтө, киэн тутта билиһиннэрбиттэриттэн астыммыттарын уонна махталларын биллэрдилэр.

Дмитрий Данилович Красильников бюһун арыйыы үөрүүлээх түгэнигэр сөп түбэһиннэрэн биир идэлээхпит, өр сылларга алын сүһүөх учууталынан таһаарыылаахтык үлэлии сылдьар, улууска биир үрдүк көрдөрүүлээх учууталбыт Саргылана Петровна Данилова "Саха өрөспүүбүлүкэтин үөрэҕирии систиэмэтин туйгуна" үрдүк ааты тутта. Саргылана Петровнаны үрдүк наҕараадатынан ис сүрэхпититтэн эҕэрдэлиибит! Баҕарабыт айымньылаах үлэтигэр өссө үрдүк ситиһиини, оҕо-аймах тапталынан, төрөппүт барҕа махталынан кынаттанан билии биэрэр, иитии иҥэрэр үтүөкэн үлэтигэр өссө үрдүк чыпчааллары, дабайыылары!!!

 

Дополнительная информация